Fae el to cayáu (primera parte)

Organiza: Asociación Socio Cultural y Deportiva El Chalanín.

Fecha: 31 de marzo de 2011.

Collacios: Enrique (maestru), Raquel, Jose Manuel, Helios, Fernando, Ovidio, Malio y Frén.

Material necesariu: 

- Materia prima: Maera.

- Ferramientes: Hachu, formón, táladru, broca, braseru, martiellu y puntes.

Introducción:  Los motivos que nos llevaron a facer un cursu d’esti tipu puen lleese EQUÍ xunto con tola información que se refier a esta actividá pero voy citar la introducción pa poner a la xente n’antecedentes:

“Dende l'Asociación Socio Cultural y Deportiva El Chalanín notemos la necesidá de reforzar los valores y principios que la cultura y tradición asturiana promueven y queremos arrescatar y da-y puxu a estes mismes a traviés d'un conxuntu d'actividaes de caráuter tantu didáuticu como llúdicu.

N'un primer llugar notemos qu'hai una pérdiga cuasi total nes actividaes tradicionales asturianes, dexándoles na más que pa un ámbitu rural secundariu, nun existiendo'n munchos casos la posibilidá de tresmitir estos conocimientos, y tando estes mismes infravaloraes pola sociedá, n'especial polos xovenes, condergando desta forma a estes actividaes tradicionales a la estinción.

Y ye por ello que nesta primera actividá lo que vamos a facer seya un taller d'artesanía, nel que tentaremos de tresmitir los conocimientos que faen falta pa facer un cayáu”

Cuadernu de bitácora:

Sábadu pela mañana y un día de sol bien prestosu pa una nueva actividá chalanina. Nesta ocasión daqué nuevo: un taller d’artesanía. A les 10:30 ya tabemos toos los participantes nel llocal de l’asociación preparaos pa ponenos a la faena. L’obxetivu del cursu, aprender a facer un cayáu. El material ya venía “preparao” de casa polo que Enrique, el maestru que diba a transmitinos los sos conocimientos nun tuvo na más que ponese a ello. 

El cursu fue discurriendo con tranquilidá y pocu a pocu fuimos pasándo, un tras utru, toos los participantes y con la ayuda d'Enrique fuimos faciendo los cayaos y animándonos ca vez más. Al final echemos la mañana entera y ficimos un total de 12 cayaos (acabemos la materia prima), pasemoslo perbien falando, contando y escuchando hestories mientres atendiemos pa les explicaciones que a tenor de la so experiencia nos diben dando entre Enrique y Jose Manuel, el padre de Raquel dos de los participantes que se acercaron desde Bimenes pa participar nesti taller. A lo postrero creemos que la experiencia fue un ésitu, y que d'elli salimos toos con la lleción bien aprendía pa ponenos a facer cayaos en casa por nuestra cuenta y sobre todo col conocimientu tresmitiu polo menos pa una xeneración más. 

tertulia

A continuación vamos intentar reflexar en 5 simples pasos to lo que fae falta pa facer un cayáu.

Fae el to cayáu pasu a pasu:

 

1. En primer llugar pa facer un cayáu fae falta la materia prima, eso ta claro, y pa ello puen usase varios tipos de maera. Nosotros pola abundancia de la misma polos montes del conceyu Llaviana, usemosla de castañu, aunque pue facese tamién con la de carbayu, fresnu, o espineru entre otros. El castañal tien que ser xoven y col grosor adecuau (entre 15-20 mm de diametru ta bien) y hai que garralu de les cañes nueves que nacen na orilla arrimaes a les castañales grandes.    

2. Una vez que se tien cortá la vara que vamos usar, lo que fae falta ye los útiles necesarios pa dai la forma. Principalmente necesitase un soporte, un tornu circular grande, y varios tornos pequeños, además d'unes cuantes cuñes de maera. Como soporte pué usase cualquier tablón que haya per casa. Pa facer los distintos tornos, nosotros usemos maera de cerezal y de castañu. 

Nel soporte hay que encaxar los distintos tornos y pa ello usemos el táladru y el formón. Hay que caxiar a la medía el soporte pa qu'encaxe'l tornu grande y furacar col táladru pa qu'encaxen los tornos pequeños. Pa los tornos pequeños, que son los que fixen el cayáu al tornu central usose un hachu y un formón mientres que pal tornu central que ye'l que-y da la forma'l mangu’l cayau usose un tornu mecánicu (aunque pue facese igualmente con formón y hachu). Los diametros de los mismos son variables siendo el de los pequeños unos 10-16 mm (el que nos dé la broca) y el del grande unos 100-120 mm (puede usase otru cayáu o un mangu paragues pa tener la medía aproximá).  

distintos tipos de tornos

3. Ya tenemos la materia prima y ya tenemos los útiles pa dai la forma. Ahora lo que nos fae falta ye que la vara doble y garre la forma sin romper ni astillar. Pa ello lo que se fae ye calentar la zona que se va a doblar en fuéu, en nuestru casu usando un braseru, aproximao unos 30 cm d'un extremu de la vara. Pa saber cuando ta, lo meyor ye la experiencia, pero un buen indicaor ye que l'agua de dientro de la maera entama a ferver y sali pol estremu.

 

 

4. Ya ta'n plan. Ahora solo queda dai la forma. Entamase poniendo el primer tornu (de los pequeños) y cuñándolu si fae falta, apretase la vara contra el tornu central. A continuación lo que hai que facer ye dir forzándo la vara pa que vaya garrando la forma del tornu central y metiendo-y los tornos y les cuñes según faiga falta. L'últimu tornu hai que ponelu nel furacu más próximu al primeru pa que de la curva salga'l cayau en rectu pa baxo. Por último hai que poner una punta (u otru tornu) pa que quede bien rectu y suxetu. 

5. Por último hai que dexalu secar, cuanto más tiempu meyor pa que cuando lu quites del soporte nun abra. Una vez descolgau solo queda pelalu, cortalu a la media, tallalu si se quier, personalizalu y barnizalu. Ye importante qu'una vez acabau nun se mueye porque corre la posibilidá de que abra.

Nosotros decidimos que vamos a dexalu un mes y mediu más o menos y en mayu vamos a reuninos toos otra vegada pa ver que tal nos quedaron. Además aprovechando la ocasión vamos a dir a visitar el Museu de la Maera y el Taller de la Madreña en Casu, y si tamos de gracía facer algo de comida de despedida. (ya actualizaremos el blog)

Ya veis que ye bien fácil facer un cayau y con un poco de práutica seguro que se pue acabar faciendo uno bien afayaizu pa dir de monter, regalalu a un collaciu o lo que seya. Dende l'asociación el Chalanín animamosvos a que polo menos lo intenteis y si tais interesaos en facer un, que vos pongais en contautu con nosotros que seguramente podamos facer otru taller o una demostración si fae falta.

semeya del grupu

Más SEMEYES