6ème TRAIL des 3 VALLEES

Organiza: Pesche-Aventures

Fecha: 09 de febreru de 2013.

Collacios: Frén y Carmen. (ver Track y Clasificación)  

Cuadernu de Bitácora:

Por primera vegada hubo una representación de la sección deportiva del Chalanín participando n'una prueba fuera de les fronteras nacionales, concretamente en Bélxica, y ya que agora vivimos equí, nun será la última. La carrera en cuestión el “Trail des 3 Vallées”, la primera de les cuatro pruebes que se van a disputar nel Forêt du Pays de Chimay, cerca del pintorescu pueblu de Couvin hasta onde nos desplazemos el día antes de la prueba...

Nesta vegada el cuartel xeneral dibemos a tenelu nel Domaine des Forges de Pernelle a escasos dos kilómetros d'onde diba a dase la salida, y onde Véro y so familia ficieronmos sentir como na casa nuesa…  Amás les vistes lleren como un ventanu a Asturies...

Y depués d’un almuerzu de picaor presentémonos na salida de la prueba al riscar el día, con una paisaxe que prometía ya que tuvo nevando toa la nueche y entamaba a columbrase el sol detrás del borrín, caún a enfrentase al so desafíu de la xornada… Carmen debutando na marcha d'andarines de 11 km y yo nel trail na distancia llarga de les tres ofrecies (33, 24 y 11 km respectivamente). En total unos 300 participantes nos xuntemos ellí sin mieu al cutu...

El trazau del trail de la carrera, sin ser demasiau duru y nada téunicu, discurría prauticamente na totalidá per viesques de carbayos, fayes y pinos, per caminos y pistes enllenos de ñeve y con continuos cambios de pendiente pero sin grandes desniveles (nun tenía na que ver con cualquier carrera per montaña de les que suelo correr per Asturies) fízoseme muy llevaeru hasta l’últimu sector onde, por apretar más de lo que debía nos primeros 25 km, diome una paxarona grande y perdí unos cuantos puestos (aunque eso ye lo de menos).

En resumen un fin de selmana pa repetir, con aloxamientu de cinco estrelles y una organización que se vuelca con la carrera, con pequeños detalles a meyorar pero que se compensen cuando el preciu d’inscripción ye tan baxu, amás que pa finar toos xuntos participemos n’una comida d’hermanamientu (incluía polos 12 € d’inscripción) onde entre los miles de sorteos que se ficieron, toconos una báscula pa pesase en casa…

(Más semeyes de Carmen)