Visita a la Reserva Natural Integral Muniellos 2012

Muniel.los Payares 2012

Organiza: Asociación Socio Cultural y Deportiva el Chalanín

Fecha: 17 y 18 de noviembre

Collacios: Helios, Efren, Efren Senior, Aroa, Carmen, Miguel, Fifi, Guillermo, Ana Belén, Samuel, Jose Manuel, Joaquín, Malio, Alba, Julio, Ana María, Fernándo, Sandra.

MUNIELLOS en semeyes (por Helios)

 

Cuadernu de bitácora: 

Como bien sabeis l'añu pasau entamamos un fin de selmana na nuesa tierra'n Somiedo y salio perbien. Darreu na más acabar la mesma, entamemos a preparar la siguiente. Pensando nun sitiu natural y virxen de la nuesa tierrina, algún propuso dir a Muniellos y nun lo dudamos...

La Reserva de Muniellos situase ente'l conceyu de Cangas del Narcea e Ibias, nel Parque Natural de les Fuentes del Narcea e Ibias, Declarau nel añu 2000 pola UNESCO Reserva de la Biosfera, ye'l mayor robledal d'España y un de los meyor conservaos d'Europa. Aparte de los robles topense fayes, ablanares, sauces, abedurios y texos. Ente la fauna que se pue topar equí tenemos l'osu pardu, el llubu, l'urogallu, el corzu, el rebecu y el xabalí.

Como ye una reserva natural integral, pa dir allá tien que pedise permisu al Principau pa poder entrar na ruta que tienen prepará pa los aventureros. Como lo queriemos facer de fin de selmana, tuvimos qu'andar finos y llamar na más que s'abriere'l plazu pal 2012 (esto fue n'avientu del 2011) Queriemos facelo na seronda porque, al tener tantu árbol caducifoliu, tenía que tar perguapu'l monte cola caida la fueya. Dieronmos permisu pal dia 18 de payares d'esti añu pa 20 chalaninos que ye'l numberu máximu diariu permitiu. Con un añu per delantre teniemos tiempu abondo pa preparalo bien.

comilona en Cangas

El fin de selmana ansiau llegó. El sabadu dia 17 de payares una expedición de 16 chalaninos arrancó pa Cangas (un par d'ellos fallaronnos y utru par llegaba'l 18). Taba un dia perfeu, llovia enforma y l'agua nun mos dexa facer nengún de los planes qu'habiemos fecho pal sábadu (unos escalar y otros facer una rutuca amañosa a mou de calentamientu pal día dempués). Dimos una vueltuca pola capital del conceyu y xintemos toos xuntos. Dempués d'una buena xinta, sobremesa y de toma'l café y el correspondiente chupitucu, hacia les 7 la tarde arrancamos pa Posada de Rengos, pa L'Artesana que ye onde cenariamos y mos quedariemos a dormir.

momentu futbolín

Dexemos les coses nel apartamentu (100% recomendable y baratu) y fuimos a tomar algo a un chigrucu cercanu cola suerte que tenía fubolín. Entamemos unes parties que duraron un par de hores, la cuentiquina pa facei sitiu a la cena que mos esperaba. Cenamos n'amor y compañía y dempués dellos fueron a dormir y dellos quedamos a tomar unos chupitinos y charrar un poco y, como non, algún saco la guitarra y hubo que animase a echar unes cantaraes al par del fueu.

El día esperau ya taba equí. Tocose diana a les 8. Nun sabemos a ciencia cierta si fueron les cantaraes d'algun de la nuechi anterior pero'l casu ye que cuando abrimos la ventana'l panorama nun llera muy esperanzaor. Orbayaba y taba friuco enforma. Estes coses puen pasar, tamos acostumbraos y pa minamos la moral a nosotros tien que pasar algo mui gordo. Llegaron los 2 que faltaben, desayunemos nel chigre y arrancamos a la “Casa'l Guardia” que ye d'onde parte la ruta.

Llegamos hacia les 10 menos algo a l'iniciu ruta. Dempués de verificar DNIs y d'una explicación d'en que consistía la ruta arrancamos toos muy contentos porque había parao d'orbayar y paecía qu'l borrin amenazante había estancaose no cimero'l monte.

Los primeros compases de la ruta ya mos dexaron ver toa la naturaleza y la pureza virxen del llugar. El camín, diba xunto'l riu Muniel.los y diba zigzagueando d'una oriella a otra ca vez que se pasaba una ponte de maera (hay ocho'n tol recorriu porque l'ultima nun pue considerase ponte como tal). El riu baxaba bravu por lo que llovió la nuechi anterior y dexaba dalguna semeya de postal. Los árboles taben enllenos de un liquen nomau barbes de San Xurde que yos daben un aspeutu particular cuanto menos.

En llegando al puntu nomau “Puente nuevo” (a una hora mas o menos del entame) el camín estrechose un poco y empezo a picar parriba. Asi siguió otra horuca mas o menos fasta pasar l'ultima “ponte” (pongo ente comilles porque taba rota y había que pasar de piedra'n piedra'l riu dando saltiquinos) onde se estrechaba mas el camín, entamaba a enllenase de piedres (según mos dixo la guarda arenisques y pizarres) y empinabase enforma. Pa detrás, l'agua que cayó de nuechi enlleno'l camín de regatos y había tramos que paecía que llera'l descenso'l Nalón del agua que baxaba.

 

Dempués d'una horuca más o menos lleguemos al cruce de caminos onde se topa la primera y única señal en tol recorriu. Ahí xiremos en dirección a les Llagunes. Ye'n camin estrechucu y relativamente planu que, dempués d'un kilometro mos lleva a una llagunuca d'onde parte un regatu que más abaxu, xuntándose con otros 3, formaran el ríu Muniellos. Como ya yera l'una y picu xintamos el bocadillo y saquemos unes semeyes pala posteridá.

Hacia les 2 de la tarde entamemos a baxar pol mismu camín qu'habíemos subio fasta'l cruce. Equí hubo división, unos tiraron pol robledal (unos 13 km de descensu) y otros per onde habiemos subio (unos 6.5 km). El baxar yera complicao con tanta agua y tanta piedra, más d'un y d'una poso'l culo embaxo. Colamos abaxu hacia les 4 y media los del camín curtiu y hacia les 5 y media los del llargu.

Dempués de cambiamos saquemos unes bandexuques d'embutio (que mos habien regalao los collacios de la asociación de fiestes de “La Pontona” por ayudalos en diches fiestes faciendo los xuegos pa los nenos) y dimos bona cuenta d'elles pa reponer fuerces. Dempués tocaba recoyer y despedise fasta la proxima aventura chalanina qu'esperamos toos que sea bien ceo.