III Trail Valgrande-Pajares

 III TRAIL VALGRANDE - PAJARES (web)

Ficha Técnica:
- Organiza:              Club Avientu-Centeno
- Fecha:                   12 de agosto de 2012
- Distancia:              22 km
- Desnivel:               3100 m (acumulado +/-)
- Collacios:              Frén (3:17:25)
                               Carmen, Helios (semeyes)

 CLASIFICACION XENERAL

 Perfíl de la prueba: 

SEMEYES:
- A.S.C.D. El Chalanín (Helios 1, Helios 2, Carmen 1)
- Rodrigo Vallina.
- Alejandro Noval.
- Jose Luis Lastra.

CUADERNU DE BITACORA: 

Depués de 5 selmanes sin poder dir al monte por motivos de trabayu, 20 hores d'avion el día anterior y solo 4 hores pa descansar ¿que hai meyor pa volver a la normalidá que dir a esparcer un poco pel monte? Esa fue la mentalidá con la que bien temprano ya taba per casa dando vueltes... 

Pocu pasaba de les 8:30 de la mañana cuando llegaba al aparcamientu de la Estación Invernal Valgrande-Pajares, onde se diba a disputar esti eventu, xunto a Carmen y Helios que me acompañaben n'esta ocasión. Entamo a ver alguna cara conocía de collacios y xuntu a ellos vamos a recoyer el dorsal y vamos trotando un pocu pa entrar en calor. Carrerina pa equí, saludar a otru per ellí, facer unes semeyes con runners de renombre, el "speaker" Ruben Nembra, collaciu de batalles animandonos sin parar y sin danos cuenta ya tabemos preparaos pa salir. Cuenta atrás dende diez y salimos... 

L'obxetivu n'esta carrera teníalu perclaru: acabar sufriendo lo menos posible, polo que dende el primer segundu fui concienciau n'ello. El primer kilometru, más o menos llanu, fui buscando un ritmu cómodu onde situame. Lloñe viase ya la cabeza de carrera con gallos como Santi Obaya (3º), Castán (1º), Merillas (2º), Heras... disputando-y la posición a un collaciu dubileru, que ca dia tan más fuertes y como sigan así l'añu que vien darán dalguna sorpresa... Pero esa yera otra carrera y yo tenía que centrame en los 21 km que me quedaben per delantre... 

Cuando entramos nos primeros metros de subida fuerte doime cuenta de lo que ya me imaxinaba: les pates nun carburaben y diba a sufrir muncho, tantu físicamente como mentalmente al nun poder llevar un ritmu cómodu. Axuntome a un grupu que paecia llevar un ritmu bastante afayaizu y decido quedame con ellos el mayor tiempu posible. Güei nun yera'l día d'apretar. Primera baxada fuerte y torna p'arriba dirección al picu Celleros. D'equí cresteamos hasta encontranos con la subida al "Cuitunigru" puntu más altu de la prueba. Más baxaes y subies y ya tamos nel kilómetru 11. <Ya ta fecho y les piernes aguanten> pienso. Nun me imaxinaba lo que me venía enriba.

La subida'l Tritu fue sin duda lo más duro de la prueba. Salvamos unos 300 metros de desnivel pero per un terrenu con pendientes de 50º en dellos llaos. La cabeza entama a furrular más de la cuenta y los fantasmas d'abandonar apaecen. Hai qu'apretar los dientes y sacar fuerces d'onde seya. Consigo llegar a lo cimero y ver a otru collaciu, Marcos Cea, dame bastantes animos. Lo más duro ta pasao. El paisaxe que me encuentro dende equí hasta el kilómetru 15 ye increible, primero un pequeñacu mayáu preciosu y depués una baxada rápida técnica. <Como me diba a perder esto> pienso. Esa ye l'actitú. Les piernes van sufriendo fae bastantes kilómetros con calambres y tirones pero por primera vegada la cabeza ta en so sitiu. 

Una nueva subida de más o menos 1 km onde fago grupu y vamos animándonos hasta qu'entamamos un rápidu descensu per una viesca de pinos perguapa, saltando ente tueros y cañes d'arboles. Que pena que pase esa llinia d'alta tensión per ellí, que mal se fizo n'Asturies el sieglu pasau, que mal se ta faciendo tovía agora, pero eso ye otra hestoria. De nuevu tenemos el Cuitunigru per delantre. Nesta segunda vegada subimos casi a pinchu por un terrenu d'escobes y matorral muy duru nel que les piernes dicenme basta, y a eso axúntase qu'al ser cara norte, Lorenzo nun ayuda nada. Nun soi a dar un pasu más sin que se me acalambren les piernes, y ca pasu ye peor. <Si les piernes nun funcionen güei habrá que tirar de brazu> pienso, y a dures penes voy medio arrastrandome usando los brazos p'ayudame a subir. La mio imaxen debía distar bastante de lo que s'imaxina d'ún atleta pero al final llegé arriba onde m'esperaba l'ultimu avituallamientu. Tomémelu con muncha calma pensando nos dos kilómetros de descensu que me quedaben per delantre. Entamo a baxar dexandome llevar. Creo que n'esos dos kilómetros nun se me quitó la sonrisa de la cara. Les pates seguien con calambres pero la inercia diba faciendome descender más o menos sin problemes. La sensación cuando encaro los últimos 500 metros va a ser dificil de qu'escaeza na mio alcordanza. Vuelvo a sentir al de Nembra pero nun soy capaz d'entender lo que díz. Cruzo la metra y estallo de rabia y d'emoción. Nunca sufrí tanto pa cruzar una meta. Nunca disfrute tanto al facelo.

 

garrando alientu pa los últimos 2 km

meta!

Resumiendo: 

La carrera más dura a la que m'enfrente, igual non la más dura pero posiblemente la que más sufrí por tar tan fuera de forma. Lo que refier a la organización: excelente. Un diez en marcaxes y avituallamientos (6 incluyendo el de meta en 22 kilómtros) piscina en meta pa recuperar, xuegos pa neños, munchos sorteos y una paella depués pa toos los corredores aunque n'esto ya nun podemos dar la nota máxima. Habrá que repetir pero un poco meyor de forma. Tamién hai que resaltar qu'en muyeres ganó Mariam Zapico (batiendo'l record) que ta intratable y posiblemente ya s'alcuentre nel top-ten nacional y en homes Castán (ex-campeón d'Europa y d'España) que vuelve a andar fuerte depués d'ún 2011 casi en blancu por mancaura.

Video Resumen III Trail Valgrande-Pajares: